|
مجموعه قصائد اصايل نجد
بسم الله الرحمن الرحيم
تحيه طيبه ارسمها عبر كلماتي
وتوجها بكل ودواحترام لمن يقراها اليكم اخواني اكتب هذه الكلمات بروح الود
اكتبها وبحلى فلسفه شعر انشرها وبأجمل معاني اكونها و من بوح قلمي اكتب واعبر
عن مشاعري بكلماتي المتواضعه وبكل عفه وطهر انثر حروفي كل مارقت وابوح بها
عبر صفحتي المحترمه واتنمى تنال أعجابكم وترضي ذائقتكم اترككم مع بوح قلمي
(صدق واحساس)
بسمك وضعت الحب تاجآ على الراس..وبسمك كتبت اشواق حبي قصايد
لايابعد عمري وروحي والأنـفاس.......غيـــرك حشى والله مانــي برايـــد
انت الوحيد بخاطري صدق واحساس..ولعـيونك اوفي لولــحقنـي زوايـــد
ياراحتـي بالــكون من بــد هــالناس.....حبك بقلبــي كل يــوم ابجـــدايـــد
اسمك على عرش المعاليق حــراس....سمــو أمــيروشيــخ مفتــي وقايـــد
جمعت وصف العز ياطــيب اساس....وحبك نشرته بالصـــحف والــجرايـــد
اسمك شبيه الحر ماقــلت قــرناس.....فارس وصــايد وانت للقلــب صـــايــد
وبسمك وضعت الحب تاجآ على الراس.. وبسمك كتــبت اشــواق حبي قصـــايد
(رغبات نفسي)
مافيه اسمآ غير اسمه دعــاني...ولاحرك احساسي من الأنس رجال
شفت المكان الصعب هذا مكاني...وســهل خلــيته لمــن كــان نزال
اهوى الصعايب لأنهالي معاني...واطمع بنور الشمس والــنورشلال
وارقا وانا اكره للمكان اطمــــاني...واطمع لمــسكي لثريا ومـــاطال
واشرب زلال الغيم والكيف زاني...واعل من سحبآ بها الـــثلج مازال
واصعد واغني للأماني امانــي...واجر صوتي واصدى يضــرب اجبال
رغبات نفسي ذي والعمر فاني...وان مستوت لاعل هالــعمــر ماطــال
(ربع وجماعه)
سافر دبي وماخذ القلب بـــيديه......بيدين منهو هـز قلبي وطــاعه
مشتاق له واشوق صعبآ اخـفيه....لاصار صوته يجذبن في سماعه
مالي صبر وان طول الوقت ياهيه... صبري نفذ مابين ربع وجماعه
والهاجس الي يم نجد وضواحيـه......خلا عيوني مهتنت في هجاعه
ساهر وفكري كل طاري يوديــه.... صوب الذي شوفه وهرجه طماعه
(احلى امسياتي)
البارحه هاتفت من له حياتي...الصاحب الي شوفته تشرح البال
نكد علي بقول ماهو ثباتي ...وانا اتحمل مايجي منه يــــــــاخال
له العتب هو دنيتي هو مناتي...يفعل على مايشتهي بي ولايسال
ياخال قله عالم الجهل فاتي ...والشمس ماتخفيه غيمه وهــــمال
ان قلت حلمي حلم واحلى امسياتي... الله يديمه لي ولوقال ماقال
اهو ربيعي والمطر ذكرياتي...وانا معه مفتون رجلــي وخيــــــال
(لانايم ولاصاحس)
حبيبي ليه انا مابيك وانت العمر وافراحي..حياتي خذعيوني بس لاتقهر وتبكيها
حياتي لاتواخذني اذا ثقلت بك امزاحي..تراك بداخل عيوني واذا عالت تـــقديـــها
تراك النور لدروبي تراك ادواي واجراحي...ترا الــدنيا بليــاكم انا والله مـــابيــها
حبيبي من زعلك اليوم لانايم ولا صاحي..اهوجس بك ولاتدري بأن الروح خاذيها
امانه يانصف قلبي تخل القلب مرتاحي...ولاتدخـل بك الشـكه بروحــآانت واليـــها
(ثلج وجمر)
أسعد ايام عمري لحضتآ في لقــــاك...احتويها بصدق الحب يــغلى بشـر
انت عمري وروحي شوفني من فداك...انـت تفـداك عيـني لـوبـغيت النظر
ياحـبيـبي مدامــه احــتواني هــــواك...ارحم القلب خــلك مسكنه والمــقر
لاتخلي حبيــبك تايــهن فــي ســماك...بيـن حـلو الكـلام وبيـن ثـلج وجمر
انت عقلي ونفسي وارضى من رضاك...وانت حلم السنين ويومها والشهر
حلمي الي سكـني والـرجا فـي رجـــاك...ياغنـاتي وجرحـي والفـرح والقهر
خل عنك الضنون وخـذ قلــبن عـطــاك...لاتحـطم ولـيفــك وانـت تـامـرأمـر
(الرجوك صارحني)
محتار منك للأسف كيف انا احتار...وانت معلمني بصدق المعاني
ارجوك صارحني بلا اسف واعذار...كانك تبي فرقاي عطني ثواني
باقول فيـــها رد قلـبي وانا اختــار...ومن بعدها ياعل دربك أماني
انا صريحه والوفاء عندي اشعار...وش عاد لوالوقت اخلف مكاني
لك درب تختاره وانا دربي اختار...ومـن النـكد خـلاص هذا كفـــاني
انا وفيت وعفت من كثر ماصار...وارجوالسموحه يوم هجرك دعاني
وختامها خذها تحيات وســــرار...تحيـه الـمخلص بعـطف وحنـــاني
لعل تروق لذائقتكم
(اصايل نجد)
| 
العرض الشجري
