هِنا التاريخ كِلـه ينحني لرضـاك يا مكه
ويكسب كل مايركع شمـوخ ويرتفـع قامه
على مافيه من كِثر الغلط والجـور والشكه
لِيَا منه سِجد كفـّر عن الـزلات فـَ أيامـه
هنا التوحيـد والايمـان والامجـاد مشتبكـه
غدت رجال راسه مرتفع وتشيلـه عظامـه
يراقبنـا ويرشدنـا نهـار نضيـع السـكـه
ونرجع للصـواب ونشكره ونقـدرقيـامه
هنـا بيـت الله المعمور والبيبان منفكـه
هنا الطرقي على الله ضيف يلقى الخيرقدامه
هنا كان النبي يرعى الغنـم ويـدور الفكه
من الدنيا وزينتها وهو سيـد علـى اقوامـه
وبلغنا الرساله من هنـا بـاب الهُـدى فكـه
عليه افضل صلاه عداد شهر الخير من صامه
هنا الصديق والفاروق كم شيطان لاصكـه
على راسه يموت ابليس لمحة عين باوهامه
هنا احفاده هنا اتباعه على السنه بـلا ربكـه
من الايمان واحدهم تشم الخير فـي اكمامه
هنا مسلم يطوف ولاحسب للعيشه الضنكه
خسر دنيا الزوال ومكسبه دمعه على حرامه
هنا يام القرى عاش الرجال اللي لهـم دبكـه
نهار الله جمعهم وسمـوا كسـرى بميسامه
وجابوا لك كنوز الفرس مثل السمـن فالعكـه
وجابوا عرش قيصر واليمن ضموه مع شامه
رجال احرار مثل النار يوم تشـب محتركه
نهار الحرب حتى الطفل يلبس درع وعمامه
هنا رجالك وحراسـك هنـا ماللغـلا فكـه
هنا ماينقطع صـوت الاذان الا مـع قيامـه
هنا لاصارت الدنيا هجيـر وحـال مرتبكـه
يجونك لو حفاه وكل واحـد يطـوي خيامـه
رحل كل القصيد ولا بقى الا قـاف يا(بكـه)
ليامنـي كتبتـه يبصـم التاريـخ بابهـامه
العرض المتطور
