يا قلب للشاعر مطرود بن عبدالله رحمه الله
السلام عليكم ورحمه الله وبركاته
قصيدة لشاعرمطرود بن عبدالله المطرودي الخالدي رحمه الله
ياقلب ياقلب العنا يامعذب
ياللي عليك الوقت ياقلب مالا
ياقلب تشكي من غثا الوقت متعب
حالك ودمعي من على الخد سالا
اوجس تقل جمرالغضا فيك مشتب
يامنحجر بين الضلوع النحالا
سهم الدهر مدميك ياقلب معطب
وصابك سهوم غير هذا توالا
يا قلب اشوفك تالي الليل تنحب
نحيب ولفٍ(ن) فارقت للرحالا
ياقلب لجلك تسهر العين ترقب
نجمٍ مقابل من شمالٍ (ن) تلالا
ولجلك اذلل كل صعبٍ(ن) تصعّب
ولجلك تسير الرجل شرق وشمالا
ولجلك نضمت القاف وحرص واجنب
ماينقده ياقلب هذا محالا
صيراف للمعنى بخيص مجرب
واصرف كما صرف الذهب والريالا
ابي لياهذت قوافيه تطرب
وتشوق سامعها لياجامجالا
ياقلب كانك من غثا الوقت تشرب
قبلك قلوبٍ(ن) وسطها الهم طالا
كم قلب يشكي من قريب مقرب
يبور لوفضله رجح بالطولا
وينسا جمايل واحدا لجله اتعب
حاله وخيره كم يوم تتالى
قال المثل ياقلب قد قيل جرب
ناكر جميل احمار قيلت مثالا
وكم قلب به نارالمحبة تلهب
يشكي فراق اللي كمل بالجمالا
وكم قلب عودٍ(ن) تالي الليل يقنب
يقنب قنيب الذيب فوق الجبالا
كبير سن من القرايب مجنب
وزودا على ذلك عقوق العيالا
وكم قلبٍ من جور الليالي تغرب
مظيوم وقته ولأقشر الهم شالا
وكم قلب محزون رجا الله يطلب
يغفر لمن هو دونه القبر حالا
وياكم قلب وقلب يشكي مصوب
هذي هي الدنيا جواب السؤالا
ياقلب انا بخبرك وحذر تقرب
من رجل بواق وفيه احتيالا
ياقلب كم رجل من الطيب يهرب
تلقاه يهرب للعلوم الهزالا
وكم رجل في بير الردى وسطها طب
ودك على وجهه تحط الشيالا
وكم رجل مابين القبايل ينشب
وده يجي بين القبايل قتالا
حقه عقب موته على الوح يصلب
ومن قبل موته ينوطي بالنعالا
وكم رجل حورف له ولافادبه طب
تبغا ترزه ماترز الحبالا
وياقلب كم رجل من النطق ينحب
زانت فعوله بالجمال وكمالا
وياقلب كم رجل على الطيب يجذب
قاع المراجل صال فيها وجالا
وياقلب كم رجل صفا مايخيب
لو هو عليه الحول ياقلب حالا
وياقلب كم رجل المثل فيه يضرب
للطيب رأسه وللمعالي تعالا
هذي بعض اصنافهم لاتعجب
ينبيك عن حال الرجال الثقالا
ياقلب خلك لليالي تحسب
العمر يمضي والليالي طوالا
خلك فطين وماجرالك تجارب
وحفظ دروس التجربه لاتزالا
ياقلب عن درب المعاصي تجنب
جنب حرام الفعل للي حلا
احرص على اللي تفعله يرضي الرب
بالله خلك دوم تمشي عدالا
امسك عرى التقوى وفيها تقضَّب
واكسب رضا ربك عزيز الجلالا
لوطال عمرك بالمنيه تصوَّب
مصيرنا ياقلب موت وزوالا
وصلاة ربي عد مالحرف يكتب
على النبي وعداد حب الرمالا
| 
العرض العادي
