باح العزا غزليه.. لشاعر.. حمد المغلوث :
انقل لكم من ما يعجبني
باح العزى قصيدة غزليه للشاعر حمد المغلوث رحمة الله عليه
باح العزا من الحبيب الجنوبي ... كن العقل يا علي بالكف مجذوب
ياعلي تذكار أريش العين دوبي .... زوله يزول لي وأنا عنه محجوب
أبكي على فرقاه والعي وأهوبي... والدمع من عيني على الخد مسكوب
من حر نار الولف مزعت ثوبي ... وطوحت بالونه على كل نبنوب
وعقب الستر كل الخلايق دروا بي... والسد ثار من الحشا ثورة الطوب
ياعلي لي نسنس نسيم الهبوبي ... نودٍ من الشرقي برى حالي النوب
سلال سل الحال من كثر لوبي ... لاهم لافرقا ولانيب مـــطبـــوب
ألا بلاي فراق من سد نوبي ... عن كل معشوق ٍ من البيض رعبوب
ياعلي يافرز الوغا يا محبوبي ... ويش أنت شايف يا حجا كل منكوب
عيا يطيب لي الكرى مع شروبي... وكن الحشا يصلى على حر لاهوب
ليت الركايب ياعلي ما مشوا بي... من ديرة المحبوب والرزق مكتوب
وياليت ربي ماسعى في ركوبي... ليت السنع معتاق والدرب مقضوب
واليوم ياغافر عظيم الذنوبي... أسالك يامطلوب ياخير مــطلـــوب
تجمع بشملي مع حبيبٍ عجوبي ... محبوب ماغيره من الناس محبوب
اللي كما بدرٍ قرب للغيوبي ... أو شمعدانٍ في دجى اللــيل مشــبوب
أصفر عفر والكف منه مخضوبي ... ومجّمله ربي ولا فيه عذروب
الا الوفا ماهو مكــورٍ كـــذوبي ... ومغفـلٍ مايعــطي العــلم مقــلوب
أنا اشهد انه ثقل الحمل صوبي ... بالحب وادعــاني شقيٍ ومــتعوب
هو ريف روحي ياعلي لو حكوا بي... مصدود عن عذل العواذل ومحجوب
ما أطيع أنا العذال لو فرقوا بي ... ولا أكف عن وصله ولا أسلى ولا أتوب
ما أسمع ولو حي عن حبيبي ولو بي ... صبر فلا حاربت زادٍ ومــشروب
ما أطيق أنا الفرقا رقاقٍ جنوبي .... وقلبي رهيف ودايم الدوم متـــعوب
يوم الليالي عن حبيبي رموا بي .... غديت مكتوف الجناحين ومصيوب
مثل الوحيد اللي غريبٍ اعزوبي ... مستاجع ماله حدٍ يقــضي الــنوب
أو شبه حيدٍ للسرات مغصوبي ... حمله ثقيــل وضارب الخف شاذوب
وألا كما طــفلٍ يتيم يحـــوبي .... من قلة الوالي ورى البــاب مذبـــوب
هذي سواتي عقب فرقا الجنوبي .... اللــي هجرني ما لفى منه مكتوب
هو يحسب إن البيض عقبه غدوا بي .. أنا بصوب وعن هوى البيض في صوب
وين أسلي اللي لا ذكرته يذوبي ... عقلي وهو متغطرسٍ يسحب الثــوب
غروٍ من البيض العذارى محسوبي ... تــرف الحشا ومعزلٍ تقل يعسوب
كن الردايف لي أقتفاها الهبوبي ... صـــيوان حــكام بالأطناب مضـــروب
وعيونه الخرسات سودٍ سطوا بي .... ونهود مثل التين والعنق مسلوب
ياعلي وين أسلى الهوى وين أتوبي ... وين أقدر التجليد والعقل منهوب
ياعلي خلوني حـزين وألـــوبي ... لوب الحمـام اللي علــى راس نبنــوب
غير الوصل ماشي يطفي لهوبي ... وصلوا على المختار ما أفتر دالوب
| 
العرض الشجري
