قصيده ريميه ويرد عليها زوجها
شقرا طويله قصيده للشاعره ريميه وزوجها يرد عليها !!!!!
شقرا طويلة !
ريميّه (حصه هلال المليحان)
ريمية تعزف على وتر الغياب في قصيدة تشبه الندى ، هي شاعرة عميقة تكتب أبيات قصيدتها بطريقة رقيقة ، لتخرج بهذا الشكل الأنيق
يا صاحبي ربّعت في جو عَمّان
ما حولك إلا كل طرقا جميله
بالديره اللي جوّها بَرْدْ وامزان
يِحِيي موات القلب بارد هميله
مابين ريفٍ رايف وضول غزلان
بين الدوالي والرموش الظليله
حولك فَرَاش ٍ هايم وليل خدران
واتلى الخبر بك عند شقرا طويله
شقرا تمايل كنها مطرق البان
بين الهوى والشعر يطرق شليله
تزري بشيخ الديِن محمود الايمان
وشلون شاعر ما يخونه صهيله
بالزود كانه شمري حر وحصان
يهوى الطراد ونص ديِنه قبيله
جوّك قصيد وجوي صياح ورعان
يا قبس قلبي قبس راس الفتيله
ودك تجدد سالفة نمر عدوان
يا خوف قلبي لا تزور السبيله
تحوف وضحا عقب حصه مليحان
بالله هَذي يا الخريصي امهيله
تقول انا في داخلي مِنْك زعلان
كثر الحسوف اليوم يسوى قليله
تنسى الدلع والملح ومحصحص الدان
وتنسى النجوم الناعسه بالجديله
لا ياولد يا صاحبي يا كحيلان
(ريميتك) لا رحت يكثر عويله
رد زوجها الشاعر فاضل بن غشم الشمري
يامن تذيِّر والهوى هز الاغصان
متخيل ٍ عقب البطا شوف زيله
الشاهد الله من تهايمْكْ عريان
وعيني عن الزين المفرِّع كليله
وين الربيع اللي به الورد نشوان؟
فصل الشتا للحين ما اودى صميله
برد ٍ يخلّي مشعل النار بردان
لو هو حليبه فاير بزنجبيله
ثلج ٍ مثل قطن ٍ تولاه قطَّان
شاب الجبل والقاع يدرج مسيله
جداي متقرفص واطقطق بالاسنان
نسرية ٍ ساق السويبع حصيله
ليتي بقربك لاتعللت دفيان
ليلي يموع وسهرتك تو.. ليله
مهو اتثاوب تالي الجمر نعسان
ابي المنام ولا بطاريك حيله
غديت تطري لي مثل كان ماكان
وامسيت كنك حاجة ٍ مستحيله
لو يجمعون الزين في كل ميزان
يرجح غلاك ابو الحمول الثقيله
لا صرت يمك كني بوسط بستان
الما ووجهك والغروس الظليله
اشتاق لك شوق المعاني للاوزان
يا اللي هروجك هابلن سلسبيله
من كثر شوقي جيت لك بام جنحان
وعوّدت اغني (دارنا.. ياجميله)
اتمنى ان تنال اعجابكم
ودي واحترامي ........
| 
العرض الشجري
