|
[ خلوها / خيره لا اكتشفت من اصحابك خساس ]
خلوها.. يا اهل الشعر واخماس الاسداس
قصيدتي هذي خطيرة مثيرة
لله.. وللتاريخ.. ولكل هالناس
ولهالحياة الزايلة والمريرة
واللي مهوب لذروة الفكر عساس
ينضم لأصحاب النفوس الكسيرة
الله الاول من قبل لفظ الانفاس
عز وجل من الظنون الصغيرة
ما مثل مثله مثل.. ولا له اجناس
يخلق مخلوقه ولا يستشيره
اذل له وانصاع له واحني الراس
اللي جعلني ما عبد رب غيره
عساه يكسوني من السندس ألباس
في يوم يعرابه الاميرة ول اميره
شاعر وذنبي غير وسكوتي اجراس
ونفسي على ما الله عطاها فقيرة
من كثر ما اعطي حب واخلاص واحساس
انا معاد اعرف وشلون اصيره
في عقلي الباطن عقيدة ونوماس
وفي واقعي خوف وتردد.. وحيرة
هل يا ترى؟ ببني على حلمي اساس
ام يا ترى ببقى على ه الوتيرة؟
والافلاس ما هو افلاس من حلم.. الافلاس؟
اذاك ما تملك لنفسك بصيره
ما خلق شي الا بقدر ومقياس
ما شي يغلب شي او يستعيره
اللي خلق خوف وخلق ضيقة وياس
خلق امن وافراح وحب وبريرة
لذلك الله لا يوليني انجاس
ويكسوني بفضله ومنه وخيره
الرب اذا تحتاج له صرت نبراس
والانسان اذا تحتاج له صرت اسيره
والناس ناتج ناس استلطفوا ناس
ابناء رغبة واستهامة وغيره
لولا التلاطف واللي ما بين الاقواس!!
ما شفت هالعالم شفوحه غفيرة
ندور ويدور بنا كل هوجاس
ومن اجل ذلك روسنا مستديره
الكل تايه في مصيره ومحتاس
وما هوب هو اللي يحدد مصيره
فياليت ما تنسى الذواليق غراس
وما ينسى مجرى المياه وخريره
اعلم اللي عاث من بعد ما جاس
ترى الجهل راس الامور الشريرة
الانسان لو يملك من الجن حراس
احقر ذبابة قادرة تستثيره
وين الملوك اللي على اقباب الافراس
راحو وخلوا المغريات الكبيرة
هالأرض ياللي برجل الناس تنداس
بواقي ابن دواد وابن المغيرة
الله يلعن كل مشرك وخناس
والله يلعن هالحياة القصيرة
صغير الادراك وصغير الباس
يشوف كل الناس مثله صغيره
يا قلب برد كل ما هب نسناس
ما دام هااليمنى ندية جديره
يفداك من رزقه قتات وتمراس
لولا رئتينه ما طلع زفيره
شفاه من طرد الملذات يباس
وهو على عد الرواة وغديره
حديثه فماقال حمزة فعباس
ما حدث لمسلم عن ابو هريرة
العمر فرحة وحده وعشرة اتعاس
ومن لا يجيره خالقه من يجيره
ومن عاش شاف وكل غبه بغطاس
والصدق خيرة مذخرته الذخيره
كل ما اكتشفت من الاصاحيب بلاس
اقول يالله جعل فالامر خيره
خيره تعرف ان به من اصحابك اخساس
خيره ولكن يا عساها الاخيره
اقسى جروح الناس تغلبه بنعاس
ما يذبح الانسان.. الا ضميره
بعض البشر مثل ابتسامات الاعراس
على كثر ما هي مثيرة.. ضريره
وحيد ولا عندك من الناس جلاس
اخير من شر الكلام وسعيره
والكل ما يخلو من اخباث وادناس
في كل نفس هناك حاجة حقيره
ف من قبل لا سوي مشاكل مع الناس
عندي مع نفسي مشاكل كثيره
,
سعد علوش
**
| 
العرض الشجري
