من اشعار الشيخ سلطان بن سحيم ال ثاني
يقول الشيخ سلطان :
المشاعر تضطرب في فؤادي من سنين=لا إله إلا الله لوتتسق قيفانها
أشعل الدنيا واسقي وتينٍ من وتين=وآتجاذبها من أشمالها وأيمانها
وأغنم الفرصة مع الصابرين الغانمين=وآتمثلها وأفك إنسها من جانها
والمشاعر قوة أقوى من الضلع المتين=لاانتقض زلزالها ماهدى بركانها
وأحسن الأبيات بيت بر الوالدين=من قراه يقول وين أنت ياحسانها
وأمك أولى بالمودة من أدنى المخلصين=قالها الهادي محمد وبيّن شانها
ماتراها تحضنك بالشمال وباليمين=لين تكبر ثم توضعك بين أجفانها
والحقيقة بعضهن حظها حظٍ مبين=من كرمها وسع الله لها ميدانها
أم سلطان التي تنبذ المتكبرين=التواضع دأبها والتقى سلطانها
حق تستاهل هدية بفل وياسمين=كل ماأسقتها بنظرة تزين أغصانها
كم يتيمٍ تكفله كم ضعيفٍ مستكين=جاه ماقوى يدينه وشد أمتانها
تمسح الدمعة قبل ترسم الخط الحزين=في خدود اللي حياته صغى ميزانها
أم ماضاقت عليها دروب المؤمنين=كلما ضاقت عليها يزيد إيمانها
القليل متاعها لاقبل المتكثرين=الكثير إذا أقبل المفلسين إحسانها
وإن صنع جارٍ لجاره كمينٍ من كمين=تصنع المعروف وتزيد في صنعانها
ماتبي ألا رحمة الله والي المتقين=قبل ماتأتي السفينة على ربانها
مخلصة ماقرّبت مايضر ومايشين=الرضا والكلمة الطيبة قربانها
يامنى عيني وياسلوة القلب المدين=المدين لمن زكى فعلها ولسانها
والله أني مانسيتك ورب العالمين=وإن نسيتك وش حياتي ووش عنوانها
كان ماأنتِ في عيوني إلى يوم اليقين=ياعنا هذي التجارة وياخسرانها
|