مخفيـه بفـوادي ولا ودى ابـديـه ..وادور الخيـرات شـرق وشامـي

احترت به ما شفـت شـيء يحليـه ..واليوم ابا انشد عنه مانيـب كامـي

سيل حدر مـع وادي غيـر واديـه ..مـدري حـلال مـاه والا حرامـي

كانه حلال وجايـز شـرب صافيـه ..وش حلله يـا مفسريـن الحلامـي

هاتـوا تفصايلـه وهاتـو معانـيـه ..نبي الدليـل اللـي عليـه الكلامـي

نبـي دليـل يفهـم الـدرب ماشيـه ..يمشـي بـه التايـه بليـل ظلامـي

يمشي به التايـه ويقـدي مواطيـه ..ويشرب قراح الما ليا صار ظامـي

لا شك هجسي يـوم خـلا مماشيـه ..انـه حـرام ومنـه زود الاثامـي

احرم مـن الزقـوم مـره وحاليـه ..وشربه على الضامي يزيد الهيامـي

الله مـن قلـب همـومـه تقـزيـه ..تـدك بـه مثـل الجـراد التهامـي

من ما جرى قامـت تتلـه مشاحيـه ..تل الرشا من فوق هـدف المقامـي

روابـع قامـت تصيبـه وتخطيـه ..شاف الهوايل واختـلاف الاسامـي

ما يسمع الداعـي ليـا قـام يدعيـه ..يعوم في بحـر مـن الهـم طامـي

مـا ينتبـه للـي بصوتـه ينـاديـه ..يزيـد همـه يـوم كــل ينـامـي

يشوف وقـت مـا عرفنـا تواليـه ..وقت يشيـب مـن بسـن الفطامـي

هـذا زمـان كـاثـرات بـلاويـه ..الغيـم يقلـب فيـه عـج وكتامـي

يا بعد شرب الما على كبـد راجيـه ..ما سيل الغبـرا زعـوج الجهامـي

انبيك يا من كلمـة الحـق ترضيـه ..اعطيك ما ينفعـك وافهـم مرامـي

قصـر يذلـك لا تقـابـل مبانـيـه ..خله عسى شامـخ طويلـه هدامـي

خله عسى ما صاب اغاديـر يفنيـه ..يـودع منازلـه الطويلـه رجامـي

لوزان مدخالـه وطالـت حواميـه ..شيد على الخيبـه قليـل الرحامـي

وحـي يوريـك المذلـه وتغلـيـه ..انا اشهد انك ميـت القلـب عامـي

مـن لا يـودك لا تـوده وترجيـه ..ارفع مقامـك يـا عزيـز المقامـي

ارفع مقامك عـن عـدوك وتوذيـه ..ويلحقك من تركت رفيقـك ملامـي

حـق الرفيـق وواجبـه لا تخليـه ..يلزمـك مثـل الوالديـن الحشامـي

اختر عزيز الجار والحـق يعطيـه ..شبل علـى هـرج يقولـه حامـي

مادك بـه عـرق المذلـه وطاريـه ..ويسبق على فعل الفضيلـة شمامـي

ومن قارب الاجرب بالامراض يعديه ..عداوه تسطـي باللحـم والعظامـي

درب السلامـه بينـات مماشـيـه ..ودرب العطب يرث عليك اللكامـي

ابعد وقلبـك نـازح البعـد يشفيـه ..وتلقى عن الدار البغيضـه مقامـي

دار بـدار وداعـي الـذل عاصيـه ..ولا تقبـل الذلـه نفـوس الكرامـي

الـذل مـوت حايمـات ضوامـيـه ..ادخل على منزل فروض الصيامـي

عن مقعـد بالـذل عينـك تراعيـه ..الموت عند الـذل امـان وسلامـي

يرضى المذله من تـردت هقاويـه ..والذل يجفل منـه قلـب العصامـي

والعبد له رب عـن النـاس يغنيـه ..ولولاه ما صاب الهدف كل رامـي